घेवा आचार इ चार ahirani kavita
घेवा आचार इ,चार
चार येदस्ना आभ्यास,करो मनलायी भारी
चार पुस्तके देतस,शानपन जास तारी
नाव जीवननी जास,भरी आस्रमस्मा चार
चार सबुद नेम्मन,हायी वानीनशे सार
चौत गनपती करो,जरा भेटे समाधान
चार लोके काय म्हती,तथ न्हयी देवो ध्यान
चार बलका खाईन,पडे आराम जीवले
चार सया बहीनीस्ना,घेवा आधार मनले
चार दिशामां कौतिक,नाव कमाडीन जावा
चार चाकनी गाडीले,वजे वजे हाकलवा
चातुर्मास आसा करो,जपी र्हावो हरीनाम
आयुखम्हा येकसाव,*चार* करी येवो धाम
वाटीनिटी सम्दा खावो,चतकोर भाकरले
चार भितम्हा सौसार,पैरी जावा साखरले
चार पहार येतस,निंघी जाथी जशा सरी
चाकोरीम्हा जीन जगो,नको हमरी तुम्हरी
काशीकन्या पाटील
काशीकन्या लिव्हस काव्य संग्रह
