ह्ररीदना तुकडा ahirani song lyrics in marathi
सातवं अहिराणी काव्य संमेलन, धुय्ये
ह्ररीदना तुकडा
आंडेरनी यादमा रडसनी
कुडचीनी बाही व्हयी वल्ली
अरे कोणी मोजु दखी का
बापनी मयानी खोली
आंडेरनी यादमा रातभर
बाप ढसाढसा रडसं
जरी बठ्ठ घरभार र्हासं संगे
तरी तो एकलाच पडसं
आंडेर बापुवरसं पडनी
असं बठ्ठ जग म्हणसं
बापना परेमनं मोलं ती
कसामा बरं गणसं
बाप काय बोलावशे
तिले बोलानं पहिले समजसं
बापना मनमाधलं गुपित
ती बरोब्बर वयखसं
समदास्ले देवनी देवो
आंडेर नमुतबनं एक
मायनी माय व्हस ती
आणि बापनी लाडकी लेक
मायपेक्षा म्हणे जास्त राहसं
बापन कोव्य मनं
आंडेरनी कायजी मझार
जासं त्येना प्रत्येक शनं
बापुनं कायीज फडफडसं
जव्हयं आंडेर जास सासरी
सनई डिजेना तालमा
,ली फिरे बाप दुखनी बासरी
कन्यादान करीसनी म्हणे
सरी जासं का? जबाबदारी
जित्ता र्हास दधलगुन बाप
आंडेरनी लेस बरं खबरदारी
स्वलिखीत अहिराणी मायबोली
सौ शारदा अशोक पाटील ,धुय्ये
कवीसंमेलन 7 वे अखिल भारतीय अहिराणी संमेलन
