Ahirani language poetry आयुष्य तेन कष्टान
आयुष्य तेन कष्टान…
कस सांगु खंत त्यानी
बळी कोनले समजेना
राब राबस वावरमा
हाल कोनले दिसेना
खचन मन हाल देखी
व्यथा बळीनी देखता
नाके नऊ येतस हो
संकटवर मात करता…!!
दिन रात एक करस
कायी मातीना कुशीमा
गैरी मोठी मेहनतथीन
येस धान्य तेना घरमा…!!
जास मार्केट ईकाले
चोर चकरा मारतस
स्वःस्त भावमा देखतस
दोन पैस नही हाते उरतस…!!
घर येता बाप दिसे
खुश व्हतस हो लेकरू
झायी लुटमार मन्ही
कस तुम्हन मन मी धरू…!!
कधय हौश नही कई
आंगवर फाटेल कपडा
परिवारना खुशी करता
रायना आयुष्यभर उघडा
अतिवृष्टी दुष्कायमा
जगन हाई खडतर
लावा तगाजा पैसाना
दारवर उभा शेठ सावकार…!!
सारखा दुष्काय पडना
माथे कर्जाना मोठा डोंगर
हाताश व्हयना नशिबी
लेस फास झाडवर…!!
Psi विनोद बी.सोनवणे धुळे अहिराणी कविता
दिनांक =११-१२-२०२४
