अहिराणी गझल Ahirani language ghazal
भावड्यासहोन नमस्कार!
मांघना तीन दिससफाईन हाई वृत्तबद्ध अहिरानी रचनावर मन्ह काम सुरु व्हतं. मोहनदादा कवळीथकर यासनासंगे विचारविनिमय करीसन आन ठोकपीट करीसन तिले आज सार्वजनिक करी र्हायनू. अहिरानी हाई बोलीभाषा शे, त्येन्हामुये बिनचूक काफिया सोधानं काम वज्जी आवघड जास, कारन गुगलम्हा हिंदी, मराठीनागत आझू अहिरानीना तुकबंदी सब्दे सापडतंसच नईत. बहुतेक त्येन्हाम्हा ती सोयच नई करेल आसवा. मन्ह्या अहिरानीम्हा लिखेल रचना मी मोहनदादाले दखाडाबिचूक सार्वजनिक करत नई.
आजनी रचनाम्हातला जवय ह्या मतलाम्हाना सबूदना बाराम्हा माले नाविलाजखाल तडजोड करनी पडनी. गझल लिखाना पह्यलेनज मी जवय, जव्हय, सवय, तधय, तव्हय, कव्हय, नितय, खवय, मव्हय आसा काफिया सोधी ठेयेल व्हतात पन ऐन मतलाम्हानच भलती भारी गडबड मोहनदादाले दखावनी, म्हनीसन त्येन्हाम्हातला जवय हावू सबूद काढी टाको आसं ठरनं,
पन बैझू गजल जमानं काई नावच नई ल्हेये. आखीर शेवट जवय हावू काफिया ल्हिसनी आन मव्हनदादानी माफी मांगीसनी काम भागाडं! भावड्यासहोन तसं दखं ते हिंदी-मराठीम्हाबी मी कविता आन गझला लिखंस पन अहिरानीम्हा माले गझल लिखताना जरा तानच पडंस, म्हनीसन मी जानकारसनी मदत ल्हेत र्हास!