ahirani language कयीना नारद
कयीना नारद
कयीना नारद “
मी असाच एक दिन आंगनमा बसेल व्हतु , तवय मन्हा मित्र नारायण सायकल वर उना आनी रस्त्यावरथुनच बोलाले लागना
“ काय आप्पा काय करी राहिना “
“ काई नै रे बठेल से उन खात “
“ वैनी शेत का घरमा ? “
“ शे ना , ती कोठे जाई घर सोडीस्नी आते “
“ तब्येत बिब्येत बरी शे ना वैनीनी “
“ हवं बरी शे , पण नारायण तु इतली काबं चौकशी करी राहिना भो “
“ काही नै रे असच “
“ आते सांगस का नै “
“ आप्पा चहानी तलफ लागेल शे , सिंगलभर चहा मियी ते बर व्हयी जाई “ नारायण बिचकतच बोलना
“ बै जु ना-या, मंग सरय सरय सांगो ना ‘ माले फुकटनी चहा ढोसल्नी शे अस्सं, वैनी घरमा शे का , तब्येत बरी शे का अशी लामेन काबं लाई राहिना “
“ आप्पा चेक करनं पडस ना , मी डायरेक्ट सांगतु ते तु काई भी कारनं सांगी देता माले,दुध नै शे , तुन्ही वैनी घर नै शे , वैनीनी तब्येत बरी नै शे असं ““ बै ना बाख्खर , तु माले तुन्हा सारखा समजना का ? इबाक ये मन्हा जोगे आनी चा पी जाय “ अस म्हनत मी रखमाले आवाज दिधा
“ रखमा ओ रखमा , तुन्हा लाडका देर उन्हा देख चा पेवाले, जराक दोन सिंगल चा ठेव ते मजानी “ मी हुकूम सोडा आनी रखमानी घरमातुन आवाज दिधा
“ हवं ऐकु उनं बरका माले , ऊस मियता ऐरंड ले भी पानी मियी जाई “
“ देख नारायण तुले रखमा ऐरंड बोलनी “ नारायण हसाले लागना आनी बोलना
“ ऐरंड ते ऐरंड, पन वैनीना हात ना चा ऊस पेक्षा गोड लागस मन्ही मी घडीघडी येस वैनीना हात नी च्या पेवाले “
नारायण आनी मी जिगरी दोस्त, तो मन्हाकडे उना म्हनजे काही तरी नवीन बातमी समजी हायी सोयाआना खरी गोट . नारायननी सायकल लायी आनी तो सांगाले लागना
“ आप्पा मी कालदिन नितीन भाऊना “ कृष्णा ज्वेलर्स “ वर गयथुत, शेवंताले पाच तोयाना पाटल्या कराले, अश्या जडबदक आनी पिव्व्याधमक पाटल्या क-यात भो , आनी तिले दिवायीले मस्त पैठणीभी लिधी मी “ नारायण बोलना आनी रखमानी हायी ऐकी लिध
“ काय भावजी काय बोलनात तुम्ही “
“ काही नयी वैनी , कपाशी ईकी ना त्या पैशातून शेवंताले पाटल्या क-यात सोनान्या . तुम्हले भी क-या व्हतीन ना आप्पानी “ हाई बोलताच रखमानी नाक फिस्कारं आनी चहाना कोप मन्हा हातमा दिधा
आ
“ कसानं काय भाऊजी, त्याले नशीब लागस, मन्ह नशीब शेवंता सारख नै शे “ असा टोमणा मारत रखमा घरमा चाल्नी गयी आनी नारायण भी चहा पीस्नी गुपचूप चालना गया , तो ते गुपचूप चालना गया पण सुतयी बाॅम्बले काडी लायी गया… हाई माले ठावूक नव्हतं.
मी थोडा येयमा घरमागऊ ते घरनं बठ्ठ वातावरण बदली गयं, रखमानं तोंड उतरेल जिलेबीना मायक फुगी जायेल व्हतं आनी चल्हाना जोगे शांतता व्हती, सयपाक पत्ता नव्हता , आनी रखमा झोपनं सोंग लीस्नी खाटलावर पडेल व्हती…..मी आवाज दिधा
“ रखमा ऽऽऽऽ ओ रखमा ऽऽऽऽ “ रखमानी हु नै का चु नै,
मी परत एकसाव आवाज दिधा “ रखमा ऽऽऽ ओ रखमा “
“ मरी गयी रखमा “ रखमानी संतापमा उत्तर दिलं
“ आवं काय व्हयनं तुले, सकायमा ते चांगली व्हती तु “
“ माले रोग ऊना “
“ आवं रखमा काय व्हयनं ते सांगशीका आते माले “
“ मी घरना करता राब राब राबस, कधी हौस नै ना मौस नै ,बठ्ठ समजी लेस, पन माले कोनी समजी लेस नै “
“ रखमा तुले बर वाटस नै का ? दवाखानामा चाल्न शे का तुले “ मी ईकार
“ म्हसनखाईमा लयी जावा माले , आते तठेज शांतता भेटी माले “ रखमा ना संताप अनावर व्हयना, ती लालबुंद व्हयनी, माले समजन नै ती आशी काबं बोली राहिनी ती . मी भी उगामुगा बठनु , दिड वाजामा उना ,पोटमा भुकना डोंब उठना , भाकरनं टोपलं झामलाले गऊते ते भी रिकामं व्हत, आते काय करो ,मी परत एक साव रखमाले हाक मारी
“ रखमा ऽऽऽ ओ रखमा “
“ मी सांगी देस तुम्हले, मन्हाशी बोलानं नै ,आनी ऐकील्या जो पावत मन्हा हातमा पाच तोयान्या पाटल्या येवावु नईत तव लगुन घरमा चुल्हा पेटावु नै “ रखमा बोल्नी आनी माले करंट लाग्न की हाई बठ्ठी नारायणनी करामत शे अशी .त्यानी कपाशी ईकी बायकोले पाटल्या कर्यात , पन मन्ही कपाशी घरमाच पडेल व्हती ,मी चांगला भाव येवानी वाट देखत व्हतु.
“ रखमा आपली कपाशी आजु घरमा शे , ईकायनी का करसुना मी भी तुले पाटल्या “
“ करा नका करा , पन जव लगुन पाटल्या मन्हा हातमा येतीत नै तव लगुन सयपाकले मन्हा रामराम “
“ पन रखमा , माले भलती भुक लागेल से त्यान्हं काय ? “
“ जावा मंग हाटेलमा आनी खावा तटेज “
रखमाना रागना फुग्गा काही कमी व्हयना नै , मी माथनीमातुन थंडगार पानी लिधं पेवाले, पानी पेवावर भी भुक शांत व्हयनी नै .हाटेलमा जाईस्नी भज्या खाईस्नी भुक भागाडी लिधी , पण रातले भी तोच तमाशा व्हयना .रात्रभर कानी उतानी जागीस्नी काढी ,काय करो नाईलाज व्हता ,मी सकायमा जल्दी उठनु, दोनचार पोरेस्ले बलाईस्नी कपाशी ट्रॅक्टरमा भरी आनी ढांगेढांग मारकेटमा जाई भिडनु…. कपाशी ईकीस्नी नितीन भाऊना “ कृष्णा ज्वेलर्स “ वर जाईस्नी पाच तोयान्या पाटल्या क-यात आनी घर ईस्नी रखमाना हातमा घाल्यात…. रखमा खुश व्हयनी आनी तितलामा नारायणनी बायको शेवंता घरमा उनी ,रखमाना हातमा सोनान्या पाटल्या देखीस्नी खुश व्हयनी आनी बोलनी
“ रखमाताई तुम्हीन भलत्या भाग्यवान शेतस , तुम्हना हातमा सोनान्या पाटल्या शेतस “
“ शेवंता तुले भी सोनान्या पाटल्या कर्यात ना मन्हा नारायण भाऊनी “ रखमानी ईचार
“ कसानं काय ताई , त्या एक नंबरना लबाड बोलतस. त्यास्नी बिनटेक्स ना पाटल्या आन्यात आनी माले दिध्यात
सोनान्या मन्हीस्नी “
“ काय बिनटेक्सन्या पाटल्या दिध्यात तुम्हले नारायननी? “मी ईचारं
“ हवं भाऊजी, त्यास्नी बिनटेक्सन्या पाटल्या दिध्यात माले”
रखमा मन्हाकडे देखीस्नी हासाले लागनी , त्या नारायण नी सोडेल पुडी माले भलतीच महाग पडनी, पन रखमा वज्जी खुश व्हयनी ती गोट माले भलतीच आवडनी
नितीन अहिरराव, धुय्ये
9096204875