लागनी ahirani kavita
सातव अहिराणी कवी संमेलन साठे मनी स्वरचित कविता:-
लागनी
जेन्ह ऱ्हास तेलेज कयस,
चुल्हा न लाकूड चुल्हा माज बयस।
दुनिया भले वैरी कर,
घरना लोकेसना संगरो कर।
येय उनी ते तेसन प्रीम आपले कयस
चुल्हा न लाकूड चुल्हा माज बयस।
दुनिया भले तु फिरी ईसी,
टेल टपोऱ्या करी ईसी।
ध्यान ठेव बाप्या,
घरनासना पोटमाज तु बयस,
चुल्हा न लाकूड चुल्हा माज बयस।
शिकी सवरीसनी साहेब बनशी,
दुनियाले भले सलाम करवशी।
धल्ला माय बाप न पुन करेल,
तेज येय वर आड एस,
चुल्हा न लाकूड चुल्हा माज बयस।
शेती-बाडी, रान-पसारा,
घरमान करस हाऊ तंटा ना मैझारा।
प्रीम ना दोन शब्देसवरी,
भाऊबंदकी ले बांधी ठेव तू सयज,
चुल्हा न लाकूड चुल्हा माज बयस।
टाइम वर आपलाज लोके काम येतस,
गाव सारं तमासा देखस।
दुनिया करस फुकट बहैयस,
चुल्हा न लाकूड चुल्हा माज बयस।
जेन्ह ऱ्हास तेलेज कयस,
चुल्हा न लाकूड चुल्हा माज बयस।
सुधाकर भामरे,बडोदे
कवीसंमेलन 7 वे अखिल भारतीय अहिराणी संमेलन
