अहिरानी इनोदी रचना
अहिरानी इनोदी रचना
भास
ऱ्हांदी ऱ्हांदी रोज ऱ्हांदू मी काय
तान मन्हा डोक्साले व्हैनावं माय||ध्रु||
पाह्येटे ऱ्हांदी व्हती उडीदनी दाय
दाद्या मन्हा नाकतोंड मोडे वं माय
रागे रागे म्हन्नू मी खाशीन ते खाय||१||
दिमयले ऱ्हांदी व्हती कांदानी पात
दाद्यानी घाली तशी कंबरम्हा लात
नको नको म्हनी तेन्हा पडू मी पाय||२||
एकदिन ऱ्हांदा मन्ही पिठलं नि भात
पिठलांम्हा काढा लंबा डोकाना बाल
झिपोट्या धरी म्हने करू का वं टाल||३||
दाद्याले खावलाना भराई गया वाय
खावाले लागस रोजनं चिकन फ्राय
किद्री ग्या जीव मन्हा ऱ्हांदाले माय ||४||
घरम्हाच बठी नुस्ता करस खावखाव
पोटम्हा कोकायेत हाड्या कावकाव
बोंबीलना बट्टावर वज्जी मारस ताव||५||
जपेल व्हतू खाटवर जपम्हा भरझाप
गुंडाभर पानी टाकं तिनी कय हो पाप
देखी ऱ्हांयतू सपन वचकावनू ओबाप||६||
भाऊ इतकं सोपं नही हाऊ शे वनवास
जे भेटनं माले ते आवडी आवडी खास
कधीमधी व्हतस माले कसामसा भास||७||
ऱ्हांधी ऱ्हांधी आशी तू वं काय बी ऱ्हांद
खायी लिसू गोड करी करावं नही नांद
ऱ्हांदी ऱ्हांदी रोज ऱ्हांधू मी काय
तान मन्हा डोक्साले व्हैनावं माय
विजय निकम चाळीसगाव
