अहिराणी बोली कविता मोबाईल

अहिराणी बोली कविता मोबाईल


              (अहिराणी बोली )
         टी व्ही मालिका दखो तठे
         ज्यानी त्यानी दुन्या न्यारी ,
         सांगता येत नही कधय त्या
         करथीन येरायेरवर खुरी …!

         हेवा दावा आवडस कोन्ले
         पैसावालास्ना रोज झगडा ,
         बाह्या नही गया हासो का रडो
         दखिस्नी आंगवरना कपडा ..!

        त्यागी जिवडाले आटकायीस्नी
        कपट कारस्थान  करतस ,
        दखणारस्ना डोयाम्हा आथा
        बयेज आसू गयी र्हातस ….!

       थोड्या खऱ्या थोड्या खोट्या
       व्हतीन त्यानाम्हान्या भावना ,
       पडदाम्हानं नकली जग इकाले
       तठे आभासी बजार भरना ..!

       टी व्ही गया नि मोबाईल उना
       तोज माणूस त्याज बटने बोटे,
       धाकला.. नैतरना संगे धल्ला
       समदास्ले भलतीज हौस वाटे..!!


          प्रा.रमेश राठोड