ahirani language खान्देशी अहिराणी
हाऊ बारीक चुरीक दखावन्हारा साधा सुधा मानूस सदान कदा पवित्र तीर्थे-बिर्थे, जत्रा-मित्रा, परिसंवाद-कईता गायन-वाचन, साहित्य संमेलने, सन-वार, उच्छाव-समारम, लग्ने-बिग्ने, मऊत-माटी, सत्कार-मित्कार, पर्यटन-बिर्यटन आसं कोनतंच ठिकान नई का जठे हाऊ नानाभाऊ आपले दखावतस नईत! जठे नई तठे जाई भिडीच जातंस ह्या नानाभाऊ ! मंगन ती जागालगून जावाले नई रात पहाट दखतंस नई कोन्ता गाडी मोटरनी वाट दखतंस बस, आपली देवबाप्पानी देयेल दोन पायी फटफटीना आसरे आसरे मन मजबूत करीसन “हिम्मते मर्दां तो! मददें खुदा!”
आसा सकारात्मक ईच्यार करीसन काटा-कुटा, दगडे-दुगडे, नदी-नाला डोंगर-गढी, किल्ला-मिल्ला वलांडत आलांडत तठलगून नेम्मन यृय वखतवर जाई भिडतंस म्हन्जे भिडतसंच! त्येन्हासाठे जीव जोखीमम्हा का घालना पडेना, गडी रात पहाट दखत नई ना उन-तान, वादय- वारा पाऊस दखंस बठंस! बस! चालतच र्हास, चालतंच र्हास! चालतच र्हास !
बापूसायेब हटकर ह्या आवढा आभायनागत उच्चा धिप्पाड साहित्यिक, गीतकार, नाटककार, विचारवंत, इतिहासना आभ्यासक, खानदेसनी मायमाटीम्हान्या बठ्ठ्या बारीक सारीक गोस्टीसना म्हाईतगार, भारतफाईन ते पार तथा इंग्लंड, इंडोनेशिया, दुबई, अमेरिकालगून अहिरानी मायबोलीना परच्यार परसार करन्हारा पुजारी जव्हय नानाभाऊ ईषई तोंड भरी भरी कवतीक करतंस ते हाऊ फार मोठा सन्मान से नानाभाऊना !
मराठी मायबोलीना संगमंगेज आपली अहिरानी मायबोलीना खराखाती ज्या काही तन मन धनथीन सेवाकरन्हारा खानदेसरत्न आन नवाजेल जागलकरी सेतंस त्सासम्हातला मानिक मोती आन आस्सल हिराले मन्हा मानना मुजरा!
नानाभाऊ !
तुम जियो हजारो साल!
हर साल के दिन हो पचास हजार!
शिवाजीआप्पा साळुंके
