बाजीरावना पोटनी ahirani language sentences
बाजीरावना पोटनी!
शब्दसाधना हाई धुयानी नावाजेल संस्थाना तेईसवा वर्धापन दिननं निमित साधीसन आज आईतवारना रोज राजवाडे संशोधन मंडयना वतिथीन
मराठी आन अहिरानीन्या गेय रचनासना कार्यकरम आसल्यामुये मी सकाय आठ वाजताच घर सोडं, आन यस्टीस्टॕनवर जाई भिडनू, दाहा पंधरा मिनीटम्हाज एक नईन कोरी लालपरी ना पाटीवर चाळीसगाव धुळे वाचीसन तिम्हा बठाले जागा भेटाले जोयजेल म्हनीसनी लगेज धावपय करत तठे लाईनम्हा लागनू, तधय मन्हा तिसराज नंबर व्हता पन जसजसा बसम्हातला लोके उतरत जायेत,
तसतसा मन्हा आवते भवतेन्या मायमावलीसनी माले मांगे, मांघे गचाडत गुच्याडत, लोटत लाटत पार साव्वा सातवा नंबरवर फेकी दीन्ह. तधय मन्ही गत काय व्हयनी हाई ते मन्ह मालेच म्हाईत. तठे जर कोन्ही फोटो काढन्हारा र्हाता ते मी त्या आयाबह्यनीसना घोयकाम्हा , आजू बाजू गोपियाँ और बीच में कन्हैय्या! आसं न्यामिनं चित्तर दखायतं! त्या घोयकाम्हातली एक मावली बोलनी, मायवं ह्या मानसेसले काय आव्हढी जल्दी र्हास काय जान? जरासाकबी बाजूले सरकतंस नईत मरीजायजो!
हाऊ सबद आयकताच मन्ह पित्त खवयनं, तसा मी ती मावलीले म्हंन्त, वं ताई, मी त्या तठे दराज्याना जोगेज हुबा व्हतू, माले ह्या बायासनीच पार आथा मांघे लोटी दिन्ह! बरं लोटं ते लोटं वरथीन तुम्हीच माले ईनाकारन बोली र्हायन्यात आते याले काय म्हनवो?
तवसाम्हा आखो दोन तीन बाया मारे जोर लाईसनी मन्हा मव्हरे निंघी ग्यात, आन मी निस्ता गम्मत दखत हुबाच र्हायनू. आसी लोटा लोटी करत कुरत कसा बसा दरवाजालगून भिडत नई तवसीन आखो एक मोठमाय माले गचालीगुचालीसनी म्हजार घुसनीच घुसनी, आसं करता करता मांघेना लोकेसनीच माले मव्हरे सरकाले भाग पाडं, आन आखेर सेवट मी कसा बसा म्हझार घुसनू ,आन एखांदी रिकामी सीट सापडंस का काय म्हनीसनी जरासा सोदतपास ल्हेवाले लागनू, पन तठेबी नीटनेम्मन टाया नईच बठना मन्हा! तथा पार सेवटना सीटवर जाई बठनं पडनं!
ह्या मायबाप सरकारनी आया बह्यनीसले आर्धा तिकीटनी सवलत दिन्ही तईन फाईन लालपरीम्हा ज्यास्तित जास्त परवास ह्या मायबहिनीज कराले लागन्यात हाई मी तुम्हले मांघना एक परवासना वखत सांगेलच से.
धुयाले भिडताच जठे कार्यकरम व्हता तठे जाई दखस ते त्या सभाग्रहम्हा दोन च्यार लोकेच बठेल दखावनात! वयखपायकना एक दोन भावड्यासना संगे चावयत बठनू, तसा एक एक करत करत काही कवी काही त्या कवयित्री येवाले लागन्यात.
दाहा वाजताना कार्यकरम जवयजवय साडे आकराले सुरू व्हयना. कार्यकरमले जव्हढा लोके येयेल व्हतात त्याम्हाबी मानसेसथिन आठ दाहा बायाच जास्ती येयेल दखावन्यात भो. ईस पंचीसना वयफाईन ते पार पंच्यांशी वरीसलगून वयना लोके गावगावथून येयेल व्हतात तठे.
स्वरचित रचनासनं गायन आन वाचन सरा नंतर बक्षीस समारम पार पडना, चंद्रशेखरदादा कासर, देवदत्त बोरसेआन दिलीपदादा पाटील, नेरकर, अहिरकर यासना निरोप ल्हीसनी बसस्टॕनवर गवू ते नेकटीच धुये ते च्याईसगाव बस भेटनी. ईम्हाबी तसाच आटापिटा करीसन काई धक्काबुक्का खाईसनी चढनूएकडावना. दुफारनं ऊन ऊन्हायानागत आग वकी र्हायन्त म्हनीसन सावलीकडनी जागावर बठाले जात नई तवसीन एक मावलीनी दूरथीनच माले जताडीसन सांगं ओ बाबा ती सीटवर नको बठू! ती मन्ही जागा से!
तसं दखाले गयं ते जिबाक ऊन व्हतं तिबाकन्या दोन चार सीटा खालीच व्हत्यात पन तठेबी मन्हा नाईलाज झाया. झकमारीसनी माले ऊन कडन्हाच सीटवर बठनं पडनं! कसातरी मन मारीसनी बठनू तवसीन तथा मांघनी सीटवरन्या बायासना गलका आयकू वुना, मांघे फिरसन दखं ते एक नयतरनी बाई एक धयडलीना संगे सीटवर बठावरथीन कज्यागत करी र्हायन्ती, तेसना वाद बागे बागे भायेरना चटका देन्हारा ऊनना मायेक ईस्तू सारखा चेटाले लागना.
व्हय वं शिलग तथी! तू काय माले स्यानपन सिकाडी र्हायनी! म्हतारी कोतारी बाईले बठाले जागा देवानं दिन्ह सोडीसनी आन बिनकामनी तोंड वाजाडी र्हायनी!आसी हाई वादावादी थांबानं काही नावच नई ल्हेये. च्याईसगाव फाटा, चौफुलुली गरताड गये, तरवाडं गयं पन त्या बाईसनं भांडन मिटता मिटेच नई!
आसी वादावादी मी पुरी जीनगानीम्हा नई दखी नि आयकी बाप!
मायन्यान भो कधी! दखता दखता मेहुनबारंबी गये पन त्या मावलीसना वाद मिटता मिटेच नई!
तुन्हा नवरा पोलिस से ते तू माले त्यान्न्ही घमेंड दावस का? आव जाय वं व्हय तथी तथी “बाजीरावना पोटनी!”
भावड्यासहोन! आते मातर मन्ह डोकं पार सुन्न पडी गये, “नासेल—! बारबोडी, हुल्लाफुकी, वान्दर मुसडी” ह्या गाया ते मी धाकलपनफाईन आयकतच येयेल से, पन हाई “बाजीरावना पोटनी” गाई आयकीसनी मातर मी पार चकराईच गवू कारन बी.ए. ले माले एक विषय ईतिहासबी व्हता म्हनीसनी मी हाई गाईना संमंध पार तथा बाजीराव पेशवाना कायलगून जोडत बठनू.घर भिडताच तुम्हनी बहीनले, बाजीरावना पोटनी यान्हा मी लायेल मतलब समजाडी सांगाले गवू तसी ती माले बोलनी का, बाजीरावना पोटनी हाई गाईना आन त्या बाजीराव मस्तानीना काय संमद से? कथाबी डोक चलाडतंस तुमीन!
याव्हर आम्हना दोन्हीसम्हा वादविवाद आझू मिटना नई!
मन्ही तुम्हले रावनाई से का हाई जी बाजीरावना पोटनी गाई से ईन्हा खरा आर्थ तुम्हीच सांगा!
मन्हा डोयासमव्हरे तो बाजीराव, ती मस्तानी आन तिन्हा तो मस्तानी महाल निसता गोंडा घोई र्हायनात
शिवाजी आप्पा साळुंके