चंदन एक आस्सल आह्यरानी आन तितकाच तुफान दर्जेदार सिनेमा
आज दुफारले साडे तीन चारना सुमारले प्रकाशदादा पिंगळवाडेकर आन इतर नायक नाईकास्न्या खूप न्यामिन्या भूमिका करीसनी साकारेल २००५ सालम्हा बनाडेल चंदन हावू अहिरनी सिनेमा दखी काढा. दखी काढा आसं म्हनापरीस हावू सिनेमा सुरु व्हताज एक सेकंदभरबी आथी तथी मान आन नजर न फिरावता दोन तास सदोतिस मिनिट मोबाईलना पडदावरथीन नजर कथाच नई भटकावता एक टक एकसारख्या दखतच -हायनू मायन्यान भो!
चंदन ना खरा आर्थ काय शे हाई समज येवाले जवय जवय दोन घंटा लागी ग्यात, तव्हय बापूसायेब चंदनसारखा झिजना! आसा डायलॉग एक कलाकारना तोंडे मोठा खुबीखाल देयेल दखावताच चंदन ना उलगडा माले नीट व्हयना!
राष्ट्रीय एकत्मता (National integration) हाई मध्यवर्ती कल्पनाना आवते भवते पूरा सिनेमा इतला बेमालूमपने गरगर गरगर फिरायेल शे का सिनेमा दखनार बठ्ठ तन, मन निरानाम ईसरीच जास. खेडागावम्हा जितल्या जाती तितला मेंबर हुबा करा परीस समदासले ल्ही चाली आन सर्वासले मान्य व्हई आसा एकच बहूमतना सरपंच आसवा हाई ईच्यारधारा आसो. एकुलती एक पोरना बाप देवघरे गया आते आक्ट कोन धरी? आसा बुरसटेल ईच्यार सोडीसनी मयत गनपानी पोरलेच आगिनडाग देवाले लाओ, पान लागनं ते फुकफाकना फन्दाम्हा न पडता दवाखानाम्हा तेले ल्ही जाओ, निराधार पोरले आधार दीसनी तिले चांगलं शिक्षन देवासाठे पैसा आडकास्नी मदत करो, आसी पुरोगामी विचारधारा शिकाडनारा चंदन सिनेमा महाराष्ट्र राज्यम्हाच नई ते आंतरराष्ट्रीय दर्जाना सिनेमास्म्हा तेले ल्ही जाई बठाडो इतला जबरदस्त, चिंतनशील, सर्वधर्मसमभावना पाठपुरावा करन्हारा भू उद्बोधक सिनेमा शे!
सिनेमाना नायक स्व खैरनार सायेब सारखा मुरेल नटनी ते संधीनं सोनं कयेच कये पन तेन्हा आंडोरनी अॕक्टींग करन्हार प्रकाशदादा पिंगयवाडेकर आन सम्दा कलाकारेसनी आपला वाटाले जे भी काई काम उनं व्हई ते नेम्मन मन लाईसनी भू शानदार करेल शे! हरेकनी आपापल्या भूमिका इतल्या जीव लाईसनी दमदारपने साकार करेल शेतीस का काही बोलानं कामज नई!
आते तुमीन म्हनश्यात का इतली काय खास बात शे ह्या सिनेमाम्हा भो? यान्हापह्यले मन्हासारखा मानसेसनी त्या कायम्हा दखेल मराठी सिनेमासम्हातला एक दोन नई ते पार नव नव नवाजेल सिनेमासले लोकेसनी डोकावर ल्ही मिरायेल माले आझू चांगलं याद शे. पन त्या सिनेमाम्हातला दोन आर्थना डॉयलाग आयकी आयकीसनी मन्हासारखा लोकेसना वज्जी कान किटाई गयन्थात. म्हनीसनी ती तुलनाम्हा *चंदन* सिनेमा माले जरा हटकेज वाटना! मोठा जेठासना मानमरातब, घरेघरन्या भानगडी, आस्सल खान्देसी खेसरगम्मत, गावम्हाना एकोपा. हाई नमूद करावाचूक माले मव्हरे जाताच येव्हाव नई!
बापूसायेब (स्व. खैरनार) यासना आस्तुरीनी भूमिकाम्हातली गिरजामाय ल्या का सरपंच ल्ह्या का तो पागलनी भूमिकाम्हातला कलाकार ल्ह्या!
पार्श्वसंगीत, गाना, दिग्दर्शन, एडिटींग सम्दं सम्दं नीटनेम्मन खूप खूप मस्त मस्त लज्जतदार, बहारदार, चटकदार दखा आयकालाईक जमाडेल शे!
अहिरानी मामबोलीन्या म्हनी आन वाक्प्रचारेस्नी ते निस्ती रेलचेल दखावनी बाप! कोन्ही म्हैस आन कोनले उठबैस! रामराम कराम्हा काय राम शे? हेर आटाई गई तिम्हा पानीच नई ते काय बील भरो? पडूदे मीटर बन पडनं ते! आझू गनज म्हनी शेतीस त्या आयकासाठे चंदन सिनेमा जरुर दखा!
अहिरानी परंपरानं काई लगीनयाह्यना भिलावू गानासनं दर्सन, मिरवनूकम्हा नाचाकुदानं, आखाजी, पित्तरपाटा आसा सनपावन काही म्हन्ता काईज सोडेल नई दखावनं. दोन तास सदोतीस मिनिटसम्हा मी पारंपरिकतासनं दर्सन करत करत आख्खा खानदेस फिरी वनू.
आते मी अहिरानी आन मराठीना तुलनात्मक ईच्यार मांडसू ते ज्यासले मराठीना वज्जी पुईका शे तेसनी राग नका मानज्यात हौ!
भावड्यासहोन तुमीन अहिरानी मायना लेकरे आशिसनी, ती मराठीना मांघे मांघे काब्र गोंडा घोयत फिरतस?
आठरा वरीसना पह्यले बनाडेल हावू “चंदन” सिनेमानी तुलना मराठीच नई ते इतर कोनतीबी भाश्यानासंगे करा आन छातीवार हात ठीसनी माले सांगा का सरस, दर्जेदार, पारंपारीकता जपनारी भाषा आपली अहिरनी मायबोली शे का नई शे?
शिवाजीआप्पा साळुंके, ‘किरन’
च्याईसगाव, जि. जयगाव.
वो बाप! हाई ते गह्यरी कभाल हुई गयी! कालदिन परोनदिनफाईन मन्हा डोकाम्हा हावू चंदन सिनेमा आसा काही मजबूत घर करी बठेल शे का तुम्हले काय सांगू! येता २७ आक्टोबरले मी धुयले चितांग सिनेमा दखाले जावाव शे! तठे चंदन सिनेमाम्हा काम करन्हारेसले भेटीसन तासना पायनी धुई डोकावार ल्हीसू. ज्या हयात नईत त्येसनीबी आठोन काढसू. तुमीनबी ईज्यात बरका? २७ तारीख नका ईसरज्यात हौ! चला ते मंग भेटूत आपन!
जय कान्हदेस जय अहिरानीमाय