अहिराणी भाषा कविता मने नको मोडू
अहिराणी भाषा कविता
नजर चुकाडीसन जाऊ नको
नजरले नजर भिडाईसन जाय
काय मारस फुलेसन अत्तर
कधय तरी फुलेसवर हात फिराई जाय..!!
आयुष्याना धडा गैरा कठिण
एकदा तरी पाने पलटाई जाय
ईरोधमा पाठ फिराई जातांना
जीवनमा थोडास नियम पाई जाय…!!
आयुष्यानी शाळा साधी सरळ
थोडस ज्ञान अंतरमा लिसन जाय
नको करू गर्व भला माणुस
एकदा गये भेट दिसन जाय…!!
स्वार्थ साधू चेला उभा रस्त्यावर
दुनियमा हुशारीमा राहत जाय
लुटमार चालस खुले आम
अन्यायले दुर करत जाय…!!
खोटी माया खोटा देखावा
माणुस जरा व्हयखत जाय
काम निंघताच रंग देखाडतस
चाल जरा तेसनी समजत जाय…!!
फायदा साठे लावा झगडा
रंग त्यासना ध्यानमा लेत जाय
नातामा गद्दारी करनार आठे
उगडा डोयाघाई देखत जाय…!!
न्यार न्यारा रंग बदलस सल्या
कधय तरी खर बोलत जाय
पाठमा खंजीर खुपसी आते
थोडस गिरेभान मा झाकत जाय…!!
चाल तुन्ही भयान भारी
देवाले तरी घाबरत जाय
मने नको मोडत जाऊ
जरा माणसे जोडत जाय…!!
Psi विनोद बी.सोनवणे धुळे
दिनांक =१०-१२-२०२४
