अहिराणी कविता कुडापा कसाले करो

ज्योशिबा संस्कार


कुडापा कसाले करो

रमत गमत बठ्ठच भेटी,
धापपयना जरासा आयुष्याम्हा
कुडापा कसाले करो…

जे व्हई ते दखाई जाई,
रडी पड़ी काही सुटाव नही, मंग,
कुडापा कसाले करो…

जीवले जीव लावणारा कैक आठे,
एक दोन नारदस्ना,
कुडापा कसाले करो…

वाईट कोनं चितानं नही,
आपलंभी कधी वाईट व्हवाव नही, मंग,
कुडापा कसाले करो…

मनपाक सत्कर्म करत जावो,
चांगलालेभी नावे ठेवनारा आठे, मंग,
कुडापा कसाले करो…
चांगलं करीनभी कवय भेटत नही यश,
भेटी उम्मेद यश, फक्त उभारी धरो,
कुडापा कसाले करो..

निस्वार्थवृत्तीना फ़ायदा व्हसज,
आनंदी ऱ्हाई हिम्मत जपत जगो,
कुडापा कसाले करो…

मनथुन मानथुन प्यारा लोके भेटथीन,
ज्या ढोंगी नी मतलाबपुरता शेतस, त्यासना,
कुडापा कसाले करो…

यानी त्यानी हाजीहाजी कराथुन,
रुबाबबन वागी आनी बोली ऱ्हावो, नुस्ता,
कुडापा कसाले करो…

लेफ्टनंट डॉ. जितेंद्र देसले