पोरी

पोरी

इतला भरोसा, तू नको ठेवजो पोरी
तुनावाला नंबर, कोले नको देजो पोरी.. 1

नीट पाय ठेव, वाट वर्ना दगडले
हरेक ना हेटे,  दपेल से इच्चू पोरी…2

गावमा भरस,  बठ्ठा अंध्यास्ना बजार
बिल्लोरी आरसाले,  (तू इकू नको पोरी )
नही गिर्हाईक पोरी…3

जथा देखो तथा, नागा साधू ना आखाडा
गंगा मा उघडी, आंग नको धोऊ पोरी..4

नही समजना, छावाले त्यास्ना कावा
स्वराज्याना साठे, दिन्ह बलिदान पोरी..5

मातीमा गाडाई, गया तो आलमगीर
मचेल दगडे, काब्र उचाडस पोरी..6

(बाप से इठ्ठल, माय जशी रखुमाई)
गीता ना अध्याय, ग्यानबानी जशी ओवी
तुक्याना  अभंग, आणि टाय से तू पोरी.. 7

तू बापनी मर्यादा, नको दारण वंडालू
पाज पिताले जह्येर, मंग पाय काढ पोरी.. 8

लिखी शिकिसन, जग दुन्यामा फिरजो
त्याग सावित्रीना, नको इसरजो पोरी..9

माय  अहिरानी, थरी मायना दूधनी
बत्तीस धारास्ना , उपकार फेड पोरी
(मायनी बोलीले, कोठे नको लाजू पोरी.. 10)

(बन) सुनीता विल्यम, जाय गगनना पार
अहिरानी ना धज, लाव आभायमा पोरी.. 11

अहिरानी माय,  सांगे हातपाय जोडी
जग दुनियामा, भारी भरू दे वं पोरी.. 12

आजून से जित्ती, भोया अनाडी लोकेस्मा
शिकेल लोकेस्नी,  धोका दिन्हा  माले  पोरी.. 13

सुदाम महाजन..
22 मार्च, 2025..